in dinon tez bahut tez hai dhaara mera

in dinoñ tez bahut tez hai dhārā merā

donoñ jānib se hī kaTtā hai kinārā merā

sard ho jaatī hai har aag bil-āḳhir ik din

dekhiye zinda hai kab tak ye sharāra merā

nafa.a-dar-nafa.a se bhī kyā kabhī zaa.il hogā

ruuh par bojh banā hai jo ḳhasāra merā

hai ye aalam ki nahīñ ḳhud ko mayassar maiñ bhī

kaise ab hotā hai mat pūchh guzārā merā

yahī chakkar mujhe markaz se alag rakhtā hai

ḳhush-nasībī hai ki gardish meñ hai taarā merā

merī majbūrī hai lafzoñ meñ nahīñ kah saktā

aur samajhtā hī nahīñ koī ishāra merā

ḳhaas number ka.ī baaqī haiñ murattab karne

hai jahāñ terā bas ik aam ishāra merā

log hairat hai samajhte haiñ mujhe ġhairat-mañd

bāt-be-bāt jo chaḌh jaatā hai paara merā

vo nazar ho jo mujhe chaak hī kar Daale 'suhail'

varna khulne kā nahīñ ramz-e-nazāra merā

in dinon tez bahut tez hai dhaara mera

donon jaanib se hi kaTta hai kinara mera

sard ho jati hai har aag bil-aKHir ek din

dekhiye zinda hai kab tak ye sharara mera

nafa-dar-nafa se bhi kya kabhi zail hoga

ruh par bojh bana hai jo KHasara mera

hai ye aalam ki nahin KHud ko mayassar main bhi

kaise ab hota hai mat puchh guzara mera

yahi chakkar mujhe markaz se alag rakhta hai

KHush-nasibi hai ki gardish mein hai tara mera

meri majburi hai lafzon mein nahin kah sakta

aur samajhta hi nahin koi ishaara mera

KHas number kai baqi hain murattab karne

hai jahan tera bas ek aam ishaara mera

log hairat hai samajhte hain mujhe ghairat-mand

baat-be-baat jo chaDh jata hai para mera

wo nazar ho jo mujhe chaak hi kar Dale 'suhail'

warna khulne ka nahin ramz-e-nazara mera