ان حسرتوں کی لاش کو دفنا رہا ہوں میں

ان حسرتوں کی لاش کو دفنا رہا ہوں میں

اے زندگی قریب ترے آ رہا ہوں میں

دشمن بھی ہو تو ہنس کے لگاؤں اسے گلے

تنہائیوں سے اس قدر اکتا رہا ہوں میں

نظریں چرائے مجھ سے نکلتے ہیں با خدا

فتنہ گروں کی آنکھ کا کانٹا رہا ہوں میں

آوارگی نہ کام کچھ آئے گی بے شعور

خانہ بدوش دل کو یہ سمجھا رہا ہوں میں

روتی رہی ہے چشم پر امید نصف شب

پہروں ترے خیال سے الجھا رہا ہوں میں

آزاد ہوں میں ٹھیک سے پہچانئے مجھے

بے چہرگی کا آپ کی چہرہ رہا ہوں میں