in sabhi daraKHton ko aandhiyon ne ghera hai

in sabhī daraḳhtoñ ko āñdhiyoñ ne gherā hai

jin kī sabz shāḳhoñ par panchhiyoñ kā Derā hai

aaj ke zamāne meñ kis ko rahnumā samjheñ

ab to har qabīle kā rāhbar luTerā hai

sau diye jalā.e haiñ dostoñ ke āñgan meñ

phir bhī mere āñgan meñ har taraf añdherā hai

tujh ko kuchh ḳhabar bhī hai mere dil kī shahzādī

mere dil ke goshe meñ bas ḳhayāl terā hai

tere hijr meñ merī dekh bujh ga.iiñ āñkheñ

kuchh nazar nahīñ aatā har taraf añdherā hai

zulm sah ke bhī maiñ ne hoñT sī liye 'ġhāzī'

ek zarf un kā hai ek zarf merā hai

in sabhi daraKHton ko aandhiyon ne ghera hai

jin ki sabz shaKHon par panchhiyon ka Dera hai

aaj ke zamane mein kis ko rahnuma samjhen

ab to har qabile ka rahbar luTera hai

sau diye jalae hain doston ke aangan mein

phir bhi mere aangan mein har taraf andhera hai

tujh ko kuchh KHabar bhi hai mere dil ki shahzadi

mere dil ke goshe mein bas KHayal tera hai

tere hijr mein meri dekh bujh gain aankhen

kuchh nazar nahin aata har taraf andhera hai

zulm sah ke bhi main ne honT si liye 'ghazi'

ek zarf un ka hai ek zarf mera hai