in sahme hue shahron ki faza kuchh kahti hai

in sahme hue shahroñ kī fazā kuchh kahtī hai

kabhī tum bhī suno ye dhartī kyā kuchh kahtī hai

ye ThiThurī huī lambī rāteñ kuchh pūchhtī haiñ

ye ḳhāmoshī āvāz-numā kuchh kahtī hai

sab apne gharoñ meñ lambī taan ke sote haiñ

aur duur kahīñ koyal kī sadā kuchh kahtī hai

jab raat ko taare baarī baarī jāgte haiñ

ka.ī Duube hue tāroñ kī nidā kuchh kahtī hai

kabhī bhor bha.e kabhī shaam paḌe kabhī raat ga.e

har aan badaltī rut kī havā kuchh kahtī hai

mehmān haiñ ham mehmān-sarā hai ye nagrī

mehmānoñ ko mehmān-sarā kuchh kahtī hai

bedār raho bedār raho bedār raho

ai ham-safaro āvāz-e-darā kuchh kahtī hai

'nāsir' āshob-e-zamāna se ġhāfil na raho

kuchh hotā hai jab ḳhalq-e-ḳhudā kuchh kahtī hai

in sahme hue shahron ki faza kuchh kahti hai

kabhi tum bhi suno ye dharti kya kuchh kahti hai

ye ThiThuri hui lambi raaten kuchh puchhti hain

ye KHamoshi aawaz-numa kuchh kahti hai

sab apne gharon mein lambi tan ke sote hain

aur dur kahin koyal ki sada kuchh kahti hai

jab raat ko tare bari bari jagte hain

kai Dube hue taron ki nida kuchh kahti hai

kabhi bhor bhae kabhi sham paDe kabhi raat gae

har aan badalti rut ki hawa kuchh kahti hai

mehman hain hum mehman-sara hai ye nagri

mehmanon ko mehman-sara kuchh kahti hai

bedar raho bedar raho bedar raho

ai ham-safaro aawaz-e-dara kuchh kahti hai

'nasir' aashob-e-zamana se ghafil na raho

kuchh hota hai jab KHalq-e-KHuda kuchh kahti hai