in zalimon ko jaur siwa kaam hi nahin

in zālimoñ ko jaur sivā kaam hī nahīñ

goyā ki un ke zulm kā anjām hī nahīñ

ġham vasl meñ hai hijr kā hijrāñ meñ vasl kā

hargiz kisī tarah mujhe ārām hī nahīñ

kyā kyā ḳharābiyāñ maiñ tire vāste sahīñ

tis par bhī chāhne kā mire naam hī nahīñ

ab ham dinoñ ko apne na ro.eñ to kyā kareñ

karne the jin meñ aish ve ayyām hī nahīñ

ve shaḳhs jin se faḳhr jahāñ ko thā ab ve haa.e

aise ga.e ki un kā kahīñ naam hī nahīñ

tum jo har ik ke dil ko satāte ho kyā miyāñ

āġhāz kā jafā ke kuchh anjām hī nahīñ

'tābāñ' batā maiñ ijz kahāñ tak kiyā karūñ

juz tark-e-mehr-yār kā paiġhām hī nahīñ

in zalimon ko jaur siwa kaam hi nahin

goya ki un ke zulm ka anjam hi nahin

gham wasl mein hai hijr ka hijran mein wasl ka

hargiz kisi tarah mujhe aaram hi nahin

kya kya KHarabiyan main tere waste sahin

tis par bhi chahne ka mere nam hi nahin

ab hum dinon ko apne na roen to kya karen

karne the jin mein aish we ayyam hi nahin

we shaKHs jin se faKHr jahan ko tha ab we hae

aise gae ki un ka kahin nam hi nahin

tum jo har ek ke dil ko satate ho kya miyan

aaghaz ka jafa ke kuchh anjam hi nahin

'taban' bata main ijz kahan tak kiya karun

juz tark-e-mehr-yar ka paigham hi nahin