inayat is qadar allahu-akbar apne bismil par

ināyat is qadar allāhu-akbar apne bismil par

kaleje par kabhī vo haath rakhte haiñ kabhī dil par

mujhe vo zab.h kar ke is liye muñh ko chhupā.e haiñ

qayāmat ho kahīñ gar chāñdnī paḌ jaa.e bismil par

dar-e-daulat pe duuñ chal kar faqīrāna sadā ik din

sunā hai dar tak aa jaate haiñ vo āvāz-e-sā.il par

tasallī aur chuTkī legī be-tābī ke pahlū meñ

kahīñ tum haath rakh denā na is Thahre hue dil par

tumhāre marne vāloñ par zamāna rashk kartā hai

maze se paañv phailā.e hue sote haiñ manzil par

kalām-e-āshiqāna sun ke har shā.ir ye kahtā hai

tumhārī nazm 'safdar' baḌh ga.ī hai nazm-e-'bedil' par

inayat is qadar allahu-akbar apne bismil par

kaleje par kabhi wo hath rakhte hain kabhi dil par

mujhe wo zabh kar ke is liye munh ko chhupae hain

qayamat ho kahin gar chandni paD jae bismil par

dar-e-daulat pe dun chal kar faqirana sada ek din

suna hai dar tak aa jate hain wo aawaz-e-sail par

tasalli aur chuTki legi be-tabi ke pahlu mein

kahin tum hath rakh dena na is Thahre hue dil par

tumhaare marne walon par zamana rashk karta hai

maze se panw phailae hue sote hain manzil par

kalam-e-ashiqana sun ke har shair ye kahta hai

tumhaari nazm 'safdar' baDh gai hai nazm-e-'bedil' par