inhin fikron mein guzri umr rahat kaisi hoti hai

inhīñ fikroñ meñ guzrī umr rāhat kaisī hotī hai

yahī uljhan rahī har dam masarrat kaisī hotī hai

batā.ūñ kyā kisī ko maiñ ki hijrat kaisī hotī hai

tamanna kī harīm-e-dil se ruḳhsat kaisī hotī hai

zarā to ġhaur kar ai dil kī farhat kaisī hotī hai

nazar phūloñ pe paḌte hī masarrat kaisī hotī hai

talāsh-e-yār meñ nikle to phir taklīf kā kyā ġham

ḳhayāl-e-ishq kyā jaane musībat kaisī hotī hai

mohabbat kī nazar se dekh le koī zarā aakar

ye hasrat hai ki āñkhoñ kī ziyārat kaisī hotī hai

jahāñ majbūriyāñ hoñ sair kar us baaġh kī jā kar

tujhe ma.alūm ho jā.egā hasrat kaisī hotī hai

ġhalat hai zāhidoñ ko naaz apnī ḳhushk taa.at par

ye pūchh un ke gunahgāroñ se rahmat kaisī hotī hai

hue lākhoñ bapā mahshar azal se aaj tak dil meñ

are vaa.iz tū kyā jaane qayāmat kaisī hotī hai

unheñ ham jān-o-dil de kar rahe taklīf meñ daa.im

na jaane aish kyā hai aur rāhat kaisī hotī hai

shikāyat hijr kī karne hī ko the josh-e-ulfat meñ

dil-e-betāb chillāyā ki furqat kaisī hotī hai

koī hai mubtalā-e-ġham koī masrūf-e-ishrat hai

magar ye koī kyā samjhe mashiyyat kaisī hotī hai

tirī manshā se haiñ bīmār darmān-o-davā se kyā

hameñ ab tak nahīñ ma.alūm sehat kaisī hotī hai

chaman meñ gul hazāroñ haiñ magar jaane se huuñ qāsir

are tauba ye kyoñ kah duuñ ki hasrat kaisī hotī hai

'umar' jo diid ke tālib haiñ vo aa.eñ to mahshar meñ

sar-e-mahfil ye dekheñge ki azmat kaisī hotī hai

inhin fikron mein guzri umr rahat kaisi hoti hai

yahi uljhan rahi har dam masarrat kaisi hoti hai

bataun kya kisi ko main ki hijrat kaisi hoti hai

tamanna ki harim-e-dil se ruKHsat kaisi hoti hai

zara to ghaur kar ai dil ki farhat kaisi hoti hai

nazar phulon pe paDte hi masarrat kaisi hoti hai

talash-e-yar mein nikle to phir taklif ka kya gham

KHayal-e-ishq kya jaane musibat kaisi hoti hai

mohabbat ki nazar se dekh le koi zara aakar

ye hasrat hai ki aankhon ki ziyarat kaisi hoti hai

jahan majburiyan hon sair kar us bagh ki ja kar

tujhe malum ho jaega hasrat kaisi hoti hai

ghalat hai zahidon ko naz apni KHushk taat par

ye puchh un ke gunahgaron se rahmat kaisi hoti hai

hue lakhon bapa mahshar azal se aaj tak dil mein

are waiz tu kya jaane qayamat kaisi hoti hai

unhen hum jaan-o-dil de kar rahe taklif mein daim

na jaane aish kya hai aur rahat kaisi hoti hai

shikayat hijr ki karne hi ko the josh-e-ulfat mein

dil-e-betab chillaya ki furqat kaisi hoti hai

koi hai mubtala-e-gham koi masruf-e-ishrat hai

magar ye koi kya samjhe mashiyyat kaisi hoti hai

teri mansha se hain bimar darman-o-dawa se kya

hamein ab tak nahin malum sehat kaisi hoti hai

chaman mein gul hazaron hain magar jaane se hun qasir

are tauba ye kyon kah dun ki hasrat kaisi hoti hai

'umar' jo did ke talib hain wo aaen to mahshar mein

sar-e-mahfil ye dekhenge ki azmat kaisi hoti hai