inikas-e-tishnagi sahra bhi hai dariya bhi hai

in.ikās-e-tishnagī sahrā bhī hai dariyā bhī hai

tar-ba-tar ye raushnī sahrā bhī hai dariyā bhī hai

aag par merā tasarruf aab par merī giraft

merī muTThī meñ abhī sahrā bhī hai dariyā bhī hai

jhiil meñ Thahrā huā hai us kā aks-e-ātishīñ

aa.ine meñ is ghaḌī sahrā bhī hai dariyā bhī hai

jal uTheñ yādoñ kī qindīleñ sadā.eñ Duub jaa.eñ

dar-haqīqat ḳhāmushī sahrā bhī hai dariyā bhī hai

zinda lauT aayā huuñ jañgal se to kyā jā-e-malāl

mere raste meñ abhī sahrā bhī hai dariyā bhī hai

koī ḳheme raakh kar de koī baazū chhīn le

ek sī ġhārat-garī sahrā bhī hai dariyā bhī hai

ret par rakhkhūñ tujhe yā bahte paanī meñ bahā.ūñ

dekh ai tishna-labī sahrā bhī hai dariyā bhī hai

tū bagūlā hai ki hai girdāb ai raqs-e-davām

faisla kar le abhī sahrā bhī hai dariyā bhī hai

dasht bhī us kī rivāyat meñ hai mauj-e-āb bhī

merī āñkhoñ kī namī sahrā bhī hai dariyā bhī hai

tū sambhālegā bhalā kaise ye saarī saltanat

'shahryār'-shā.erī sahrā bhī hai dariyā bhī hai

inikas-e-tishnagi sahra bhi hai dariya bhi hai

tar-ba-tar ye raushni sahra bhi hai dariya bhi hai

aag par mera tasarruf aab par meri giraft

meri muTThi mein abhi sahra bhi hai dariya bhi hai

jhil mein Thahra hua hai us ka aks-e-atishin

aaine mein is ghaDi sahra bhi hai dariya bhi hai

jal uThen yaadon ki qindilen sadaen Dub jaen

dar-haqiqat KHamushi sahra bhi hai dariya bhi hai

zinda lauT aaya hun jangal se to kya ja-e-malal

mere raste mein abhi sahra bhi hai dariya bhi hai

koi KHeme rakh kar de koi bazu chhin le

ek si ghaarat-gari sahra bhi hai dariya bhi hai

ret par rakhkhun tujhe ya bahte pani mein bahaun

dekh ai tishna-labi sahra bhi hai dariya bhi hai

tu bagula hai ki hai girdab ai raqs-e-dawam

faisla kar le abhi sahra bhi hai dariya bhi hai

dasht bhi us ki riwayat mein hai mauj-e-ab bhi

meri aankhon ki nami sahra bhi hai dariya bhi hai

tu sambhaalega bhala kaise ye sari saltanat

'shahryar'-shaeri sahra bhi hai dariya bhi hai