inkar ki talab hai na iqrar ki talab

inkār kī talab hai na iqrār kī talab

dil meñ hai mere bas tire dīdār kī talab

hotī hai jaise sub.h ko aḳhbār kī talab

hone lagī hai phir kisī dildār kī talab

ḳhvāhish ki ho sukūn mirī zindagī ke saath

sahrā meñ jaise sāya-e-dīvār kī talab

parchhā.iyoñ ne saath na chhoḌā tamām umr

shāyad isī ko kahte haiñ sansār kī talab

duzdīda-nigāhī se tirī jaag uThī hai

muddat pe kisī nargis-e-bīmār kī talab

jab māñgne pe aao to kyā kyā na maañg lo

'jāved' aap kījiye kirdār kī talab

inkar ki talab hai na iqrar ki talab

dil mein hai mere bas tere didar ki talab

hoti hai jaise subh ko aKHbar ki talab

hone lagi hai phir kisi dildar ki talab

KHwahish ki ho sukun meri zindagi ke sath

sahra mein jaise saya-e-diwar ki talab

parchhaiyon ne sath na chhoDa tamam umr

shayad isi ko kahte hain sansar ki talab

duzdida-nigahi se teri jag uThi hai

muddat pe kisi nargis-e-bimar ki talab

jab mangne pe aao to kya kya na mang lo

'jawed' aap kijiye kirdar ki talab