انقلابات مسلسل کا اثر دیکھا ہے

انقلابات مسلسل کا اثر دیکھا ہے

میں نے عیبوں میں ہنر خیر میں شر دیکھا ہے

گردش وقت نے جب سے مرا گھر دیکھا ہے

زیست کو وقف غم شام و سحر دیکھا ہے

خون دل خون وفا خون جگر دیکھا ہے

یہ تماشا بہ سر راہ گزر دیکھا ہے

آج پھر ٹوٹنے والی ہے قیامت شاید

آج پھر اس نے بہ انداز دگر دیکھا ہے

جس کو دنیا نے بٹھایا تھا کبھی پلکوں پر

آج اسی شخص کو پامال نظر دیکھا ہے

معنیٔ حرف زوال اس کو بھلا کیا معلوم

جس نے سورج کو فقط وقت سحر دیکھا ہے

پھر بھی آسودہ نہ ہو پائیں نگاہیں رہبرؔ

میں نے ہرچند اسے تا حد نظر دیکھا ہے