insaf jo nadar ke ghar tak nahin pahuncha

insāf jo nādār ke ghar tak nahīñ pahuñchā

samjho ki abhī haath samar tak nahīñ pahuñchā

mizhgāñ pe ruke haiñ abhī Dhalke nahīñ aañsū

ye soch kā sailāb safar tak nahīñ pahuñchā

kuchh log abhī ḳhair kī ḳhvāhish ke amiiñ haiñ

dastār kā jhagḌā abhī sar tak nahīñ pahuñchā

parvāz meñ thā amn kā ma.asūm parinda

sunte haiñ ki be-chāra shajar tak nahīñ pahuñchā

insān to dukh-dard ke sahrāoñ meñ gum hai

ye qāfila ḳhushiyoñ ke Dagar tak nahīñ pahuñchā

muddat se mohabbat ke safar meñ huuñ 'karāmat'

lekin abhī chāhat ke nagar tak nahīñ pahuñchā

insaf jo nadar ke ghar tak nahin pahuncha

samjho ki abhi hath samar tak nahin pahuncha

mizhgan pe ruke hain abhi Dhalke nahin aansu

ye soch ka sailab safar tak nahin pahuncha

kuchh log abhi KHair ki KHwahish ke amin hain

dastar ka jhagDa abhi sar tak nahin pahuncha

parwaz mein tha amn ka masum parinda

sunte hain ki be-chaara shajar tak nahin pahuncha

insan to dukh-dard ke sahraon mein gum hai

ye qafila KHushiyon ke Dagar tak nahin pahuncha

muddat se mohabbat ke safar mein hun 'karamat'

lekin abhi chahat ke nagar tak nahin pahuncha