insan hai to kibr sin kahta hai kyun ana

insān hai to kibr siiñ kahtā hai kyuuñ anā

aadam to ham sunā hai ki vo ḳhaak se banā

kaisā milā hai ham siiñ ki ab lag hai anmanā

sun kar hamārī baat kuuñ kartā hai haañ na nā

mukhḌe kī nau-bahār huī ḳhat se āshkār

sabza na thā ye husn kā banjar thā par ghanā

murdā hai be-visāl rahe go ki jāgtā

sotā huuñ yaar saath so zindoñ meñ jāgnā

duunī bimārī jab siiñ batāte haiñ fāhisha

mal mal ke jis qadar ki ghinānte haiñ ubTanā

yuuñ dil hamārā ishq kī ātish meñ ḳhush huā

bhun kar tamām aag meñ khiltā hai juuñ chanā

nahiñ āb-o-gil sifat tire tan ke ḳhamīr kī

kartā huuñ jaan o dil kuuñ lagā us kī maiñ sanā

jab 'ābrū' kā byaah huā bakr fikr siiñ

tab shā.eroñ ne naam rakhā us kā but banā

insan hai to kibr sin kahta hai kyun ana

aadam to hum suna hai ki wo KHak se bana

kaisa mila hai hum sin ki ab lag hai anmana

sun kar hamari baat kun karta hai han na na

mukhDe ki nau-bahaar hui KHat se aashkar

sabza na tha ye husn ka banjar tha par ghana

murda hai be-visal rahe go ki jagta

sota hun yar sath so zindon mein jagna

duni bimari jab sin batate hain fahisha

mal mal ke jis qadar ki ghinante hain ubTana

yun dil hamara ishq ki aatish mein KHush hua

bhun kar tamam aag mein khilta hai jun chana

nahin aab-o-gil sifat tere tan ke KHamir ki

karta hun jaan o dil kun laga us ki main sana

jab 'abru' ka byah hua bakr fikr sin

tab shaeron ne nam rakha us ka but bana