insan hun ghir gaya hun zamin ke KHudaon mein

insāñ huuñ ghir gayā huuñ zamīñ ke ḳhudāoñ meñ

ab bastiyāñ basā.ūñgā jā kar ḳhalāoñ meñ

yādoñ ke naqsh kanda haiñ nāmoñ ke ruup meñ

ham ne bhī din guzāre daraḳhtoñ kī chhāñv meñ

dauḌā ragoñ meñ ḳhuuñ kī tarah shor shahr kā

ḳhāmoshiyoñ ne chhīn liyā chain gaañv meñ

yuuñ to ravāñ haiñ mere ta.āqub meñ manzileñ

lekin maiñ Thokaroñ ko lapeTe huuñ paañv meñ

vo aa ke chal diye haiñ ḳhayāloñ maiñ gum rahā

qadmoñ kī chaap dab ga.ī dil kī sadāoñ meñ

sar rakh ke so gayā huuñ ġhamoñ kī salīb par

shāyad ki ḳhvāb le uḌeñ hañstī fazāoñ meñ

ek ek kar ke log nikal aa.e dhuup meñ

jalne lage the jaise sabhī ghar kī chhāñv meñ

sahrā kī pyaas le ke chalā jin ke saath saath

paanī kī ek buuñd na thī un ghaTāoñ meñ

jalte gulāb meñ na zarā sī bhī aañch thī

ham to jale haiñ hijr kī ThanDī ḳhizāoñ meñ

insan hun ghir gaya hun zamin ke KHudaon mein

ab bastiyan basaunga ja kar KHalaon mein

yaadon ke naqsh kanda hain namon ke rup mein

hum ne bhi din guzare daraKHton ki chhanw mein

dauDa ragon mein KHun ki tarah shor shahr ka

KHamoshiyon ne chhin liya chain ganw mein

yun to rawan hain mere taaqub mein manzilen

lekin main Thokaron ko lapeTe hun panw mein

wo aa ke chal diye hain KHayalon main gum raha

qadmon ki chap dab gai dil ki sadaon mein

sar rakh ke so gaya hun ghamon ki salib par

shayad ki KHwab le uDen hansti fazaon mein

ek ek kar ke log nikal aae dhup mein

jalne lage the jaise sabhi ghar ki chhanw mein

sahra ki pyas le ke chala jin ke sath sath

pani ki ek bund na thi un ghaTaon mein

jalte gulab mein na zara si bhi aanch thi

hum to jale hain hijr ki ThanDi KHizaon mein