انسان اسی طرح سے ہیں صاحب عجیب ہیں

انسان اسی طرح سے ہیں صاحب عجیب ہیں

اتنا نہ غور کیجیے ہم سب عجیب ہیں

الجھا دیا ہے کیسا دل و بے دلی کے بیچ

اے روزگار عشق یہ کرتب عجیب ہیں

میں کون ہوں تو کون ہے یہ لوگ کون ہیں

کس نے کیے یہ درجے مرتب عجیب ہیں

کہتا ہے دل کہ ایک ذرا چوم دیکھیے

دل کش تو خیر ہوتے ہیں وہ لب عجیب ہیں

ہم سے نہ سطر ہست پہ کچھ گفتگو کرو

اپنی سمجھ میں آئے جو مطلب عجیب ہیں

سب ٹھیک تھے ہمیں ہی شکایت عبث رہی

حیدرؔ ہم ایسے لوگ کھلا اب عجیب ہیں