insan ke dilon mein jab aaen mohabbaten

insān ke diloñ meñ jab aa.eñ mohabbateñ

phir duur nafratoñ ko bhagā.eñ mohabbateñ

nafrat ke peḌ deñge hameñ nafratoñ ke phal

chāhat ke biij bo.eñ ugā.eñ mohabbateñ

kartī nahīñ haiñ farq vo aulād meñ kabhī

detī haiñ sab ko ek sī maa.eñ mohabbateñ

detā hai us ko naam havas kā sadā jahāñ

oḌheñ na sharm kī jo qabā.eñ mohabbateñ

shāyad ye saare dūsrī duniyā ke lafz haiñ

tāzīm ehtirām vafā.eñ mohabbateñ

nīñdoñ ke saath saath hasīñ ḳhvāb chhīn leñ

detī haiñ āshiqoñ ko sazā.eñ mohabbateñ

'anjum' jo nā-balad haiñ ḳhulūs aur vafāoñ se

aao ki un ko chal ke sikhā.eñ mohabbateñ

insan ke dilon mein jab aaen mohabbaten

phir dur nafraton ko bhagaen mohabbaten

nafrat ke peD denge hamein nafraton ke phal

chahat ke bij boen ugaen mohabbaten

karti nahin hain farq wo aulad mein kabhi

deti hain sab ko ek si maen mohabbaten

deta hai us ko nam hawas ka sada jahan

oDhen na sharm ki jo qabaen mohabbaten

shayad ye sare dusri duniya ke lafz hain

tazim ehtiram wafaen mohabbaten

nindon ke sath sath hasin KHwab chhin len

deti hain aashiqon ko sazaen mohabbaten

'anjum' jo na-balad hain KHulus aur wafaon se

aao ki un ko chal ke sikhaen mohabbaten