insan mal-o-zar ka parastar ho gaya

insān māl-o-zar kā parastār ho gayā

āsān ab zamīr kā byopār ho gayā

mujrim-dimāġh jurm kā bīmār ho gayā

duniyā samajh rahī hai ki fankār ho gayā

jis ne chalā.ī zulm-o-ta.assub kī āñdhiyāñ

qānūn kaise us kā madad-gār ho gayā

le de ke naukrī pe chaḌhe kah rahe haiñ log

bhagvān kī dayā hai chamatkār ho gayā

ahbāb mere chehre se paḌhte haiñ hādse

goyā ki hādsoñ kā maiñ aḳhbār ho gayā

rakkhī hai tū ne mere liye qabr kī zamīn

tere tufail maiñ bhī zamīñ-dār ho gayā

paḌh likh ke beTā itnā baḌā ho gayā ki aaj

māñ-bāp se hī barsar-e-paikār ho gayā

insan mal-o-zar ka parastar ho gaya

aasan ab zamir ka byopar ho gaya

mujrim-dimagh jurm ka bimar ho gaya

duniya samajh rahi hai ki fankar ho gaya

jis ne chalai zulm-o-tassub ki aandhiyan

qanun kaise us ka madad-gar ho gaya

le de ke naukri pe chaDhe kah rahe hain log

bhagwan ki daya hai chamatkar ho gaya

ahbab mere chehre se paDhte hain hadse

goya ki hadson ka main aKHbar ho gaya

rakkhi hai tu ne mere liye qabr ki zamin

tere tufail main bhi zamin-dar ho gaya

paDh likh ke beTa itna baDa ho gaya ki aaj

man-bap se hi barsar-e-paikar ho gaya