insaniyat ko dard ka darman kahega kaun

insāniyat ko dard kā darmāñ kahegā kaun

ab aadmī ko hazrat-e-insāñ kahegā kaun

sab kuchh vahī hai aaj bhī chehre badal ga.e

shām-e-ḳhizāñ ko sub.h-e-bahārāñ kahegā kaun

ab zindagī ke ma.anī-o-matlab badal ga.e

ab zindagī ko ḳhvāb-e-pareshāñ kahegā kaun

yuuñ hai kamāl-e-azmat-e-ādam lahū lahū

ab dāstān-e-azmat-e-insāñ kahegā kaun

haiñ har qadam pe rāhzan-e-rāhbar-numā

ab manzil-e-hayāt ko āsāñ kahegā kaun

sāhil meñ pal rahe haiñ jo un par nazar rahe

har mauj-e-be-qarār ko tūfāñ kahegā kaun

kuchh mas.ale haiñ aur bhī ab zindagī ke saath

ik tere ġham ko hāsil-e-armāñ kahegā kaun

ai kū-e-yār vo tire dīvāne kyā hue

terī galī ko kūcha-e-jānāñ kahegā kaun

insaniyat ko dard ka darman kahega kaun

ab aadmi ko hazrat-e-insan kahega kaun

sab kuchh wahi hai aaj bhi chehre badal gae

sham-e-KHizan ko subh-e-bahaaran kahega kaun

ab zindagi ke mani-o-matlab badal gae

ab zindagi ko KHwab-e-pareshan kahega kaun

yun hai kamal-e-azmat-e-adam lahu lahu

ab dastan-e-azmat-e-insan kahega kaun

hain har qadam pe rahzan-e-rahbar-numa

ab manzil-e-hayat ko aasan kahega kaun

sahil mein pal rahe hain jo un par nazar rahe

har mauj-e-be-qarar ko tufan kahega kaun

kuchh masale hain aur bhi ab zindagi ke sath

ek tere gham ko hasil-e-arman kahega kaun

ai ku-e-yar wo tere diwane kya hue

teri gali ko kucha-e-jaanan kahega kaun