intiha-e-yas-o-gham se jab guzar jata hun main

intihā-e-yās-o-ġham se jab guzar jaatā huuñ maiñ

har qadam par ik sukūn-e-qalb sā paatā huuñ maiñ

sāz-e-ġham par jab kabhī koī ġhazal gaatā huuñ maiñ

ik sarāpā soz kī tasvīr ban jaatā huuñ maiñ

har qadam par ek aafat har qadam par ik balā

phir bhī manzil kī taraf baḌhtā chalā jaatā huuñ maiñ

phir kisī taaza pareshānī ko hai merī talāsh

phir kisī ko multafit apnī taraf paatā huuñ maiñ

allah allah maslak-e-mehr-o-mohabbat ai 'atīq'

aah koī bhī kare lekin taḌap jaatā huuñ maiñ

intiha-e-yas-o-gham se jab guzar jata hun main

har qadam par ek sukun-e-qalb sa pata hun main

saz-e-gham par jab kabhi koi ghazal gata hun main

ek sarapa soz ki taswir ban jata hun main

har qadam par ek aafat har qadam par ek bala

phir bhi manzil ki taraf baDhta chala jata hun main

phir kisi taza pareshani ko hai meri talash

phir kisi ko multafit apni taraf pata hun main

allah allah maslak-e-mehr-o-mohabbat ai 'atiq'

aah koi bhi kare lekin taDap jata hun main