intizar-e-hashr kar sakte nahin nakaam-e-ishq

intizār-e-hashr kar sakte nahīñ nākām-e-ishq

aaj hī ho jaa.e honā ho jo kal anjām-e-ishq

ibtidā meñ dard-e-furqat maut hai anjām-e-ishq

ahl-e-dil ko nā-muvāfiq hai havā-e-bām-e-ishq

be-ḳhudī meñ DabDabā aa.e haiñ aañsū aañkh meñ

al-madad ai zabt chhalkā chāhtā hai jām-e-ishq

us kī ulfat ne kiyā rusvā-e-ālam kis qadar

uñgliyāñ uThtī haiñ jaate haiñ jidhar badnām-e-ishq

kyoñ nasīhat meñ tirī nāseh haiñ ye dil-sozīyāñ

kyā tire dil par guzarte haiñ mire ālām-e-ishq

chashm-e-giryāñ qalb-e-nālāñ kī shamātat qahr hai

donoñ mil kar ik mujhī ko dete haiñ ilzām-e-ishq

hasrateñ bhī aaj dil ke saath hī dam toḌ deñ

aage pīchhe saath vāloñ kā na ho anjām-e-ishq

baam par aa kar zarā bikhrā.iye zulf-e-darāz

phail jaa.e saare aalam meñ savād-e-shām-e-ishq

aur kyā e.ajāz hotā husn-e-lailā ke liye

mar gayā majnūñ magar zinda hai ab tak nām-e-ishq

chaar hī din meñ 'nazar' tum is qadar ghabrā ga.e

āsmāñ se koī pūchhe gardish-e-ayyām-e-ishq

intizar-e-hashr kar sakte nahin nakaam-e-ishq

aaj hi ho jae hona ho jo kal anjam-e-ishq

ibtida mein dard-e-furqat maut hai anjam-e-ishq

ahl-e-dil ko na-muwafiq hai hawa-e-baam-e-ishq

be-KHudi mein DabDaba aae hain aansu aankh mein

al-madad ai zabt chhalka chahta hai jam-e-ishq

us ki ulfat ne kiya ruswa-e-alam kis qadar

ungliyan uThti hain jate hain jidhar badnam-e-ishq

kyon nasihat mein teri naseh hain ye dil-soziyan

kya tere dil par guzarte hain mere aalam-e-ishq

chashm-e-giryan qalb-e-nalan ki shamatat qahr hai

donon mil kar ek mujhi ko dete hain ilzam-e-ishq

hasraten bhi aaj dil ke sath hi dam toD den

aage pichhe sath walon ka na ho anjam-e-ishq

baam par aa kar zara bikhraiye zulf-e-daraaz

phail jae sare aalam mein sawad-e-sham-e-ishq

aur kya eajaz hota husn-e-laila ke liye

mar gaya majnun magar zinda hai ab tak nam-e-ishq

chaar hi din mein 'nazar' tum is qadar ghabra gae

aasman se koi puchhe gardish-e-ayyam-e-ishq