اقبالؔ کا ثانی ہیں نہ غالبؔ کا بدل ہیں

اقبالؔ کا ثانی ہیں نہ غالبؔ کا بدل ہیں

بس ہم بھی نمائندۂ تہذیب غزل ہیں

یہ سوچ کے ہنستے ہوئے جیتے ہیں جہاں میں

دنیا کے مسائل ہی ہمارے لیے حل ہیں

جب خود سے ملاقات کروں خود سے کروں بات

اللہ مرے واسطے وہ کون سے پل ہیں

پتھر بھی نہ مارو گے تو گر جائیں گے سڑ کر

اترائے ہوئے اپنی بلندی پہ جو پھل ہیں

پائی یہ سزا کاٹے گئے ہاتھ ہمارے

یہ جرم کہ ہم نقش گر تاج محل ہیں

حالات کی آندھی نہ مٹا پائے گی معراجؔ

پتھر کی لکیروں کی طرح ہم بھی اٹل ہیں