iqbaal ka sani hain na ghaalib ka badal hain

'iqbāl' kā saanī haiñ na 'ġhālib' kā badal haiñ

bas ham bhī numā.inda-e-tahzīb-e-ġhazal haiñ

ye soch ke hañste hue jiite haiñ jahāñ meñ

duniyā ke masā.il hī hamāre liye hal haiñ

jab ḳhud se mulāqāt karūñ ḳhud se karūñ baat

allāh mire vāste vo kaun se pal haiñ

patthar bhī na māroge to gir jā.eñge saḌ kar

itrā.e hue apnī bulandī pe jo phal haiñ

paa.ī ye sazā kaaTe ga.e haath hamāre

ye jurm ki ham naqsh-gar-e-tāj-mahal haiñ

hālāt kī āñdhī na miTā pā.egī 'merāj'

patthar kī lakīroñ kī tarah ham bhī aTal haiñ

'iqbaal' ka sani hain na 'ghaalib' ka badal hain

bas hum bhi numainda-e-tahzib-e-ghazal hain

ye soch ke hanste hue jite hain jahan mein

duniya ke masail hi hamare liye hal hain

jab KHud se mulaqat karun KHud se karun baat

allah mere waste wo kaun se pal hain

patthar bhi na maroge to gir jaenge saD kar

itrae hue apni bulandi pe jo phal hain

pai ye saza kaTe gae hath hamare

ye jurm ki hum naqsh-gar-e-taj-mahal hain

haalat ki aandhi na miTa paegi 'meraj'

patthar ki lakiron ki tarah hum bhi aTal hain