iqrar-e-wafa ummid-e-karam kuchh kah na sake kuchh bhul gae

iqrār-e-vafā ummīd-e-karam kuchh kah na sake kuchh bhuul ga.e

va.ade vo tire mub.ham mub.ham kuchh kah na sake kuchh bhuul ga.e

sarshārī-e-ulfat kā aalam kuchh kah na sake kuchh bhuul ga.e

jazbāt kī vo dhīmī sargam kuchh kah na sake kuchh bhuul ga.e

ālām kī vo yūrish paiham kuchh kah na sake kuchh bhuul ga.e

Duubī huī nabzoñ kā aalam kuchh kah na sake kuchh bhuul ga.e

yādoñ kī ḳhalish vo shām-o-sahar māyūs se vo dīvār-o-dar

ehsās kī lau maddham maddham kuchh kah na sake kuchh bhuul ga.e

kyā vahm-o-gumāñ kyā ilm-o-yaqīñ kyā fikr-o-ġham-e-duniyā-o-dīñ

hastī ke vo saare pech-o-ḳham kuchh kah na sake kuchh bhuul ga.e

vo sher-e-mujassam jān-e-suḳhan har saañs meñ yuuñ hai naġhma-zan

afsāna-e-ġham rūdād-e-alam kuchh kah na sake kuchh bhuul ga.e

kab daur-e-ḳhizāñ aayā aur kab ruḳhsat vo gul-e-ra.anā.ī huā

mahrūmi-e-jāñ majbūri-e-ġham kuchh kah na sake kuchh bhuul ga.e

dil aise purāne paapī ko kyā kaam hai dīn-o-īmāñ se

vo sāz-e-kalīsā soz-e-haram kuchh kah na sake kuchh bhuul ga.e

unvān yahī Thahre 'sarvar' afsāna-e-hastī ke tere

yā qalb-e-hazīñ yā dīda-e-nam kuchh kah na sake kuchh bhuul ga.e

iqrar-e-wafa ummid-e-karam kuchh kah na sake kuchh bhul gae

wade wo tere mubham mubham kuchh kah na sake kuchh bhul gae

sarshaari-e-ulfat ka aalam kuchh kah na sake kuchh bhul gae

jazbaat ki wo dhimi sargam kuchh kah na sake kuchh bhul gae

aalam ki wo yurish paiham kuchh kah na sake kuchh bhul gae

Dubi hui nabzon ka aalam kuchh kah na sake kuchh bhul gae

yaadon ki KHalish wo sham-o-sahar mayus se wo diwar-o-dar

ehsas ki lau maddham maddham kuchh kah na sake kuchh bhul gae

kya wahm-o-guman kya ilm-o-yaqin kya fikr-o-gham-e-duniya-o-din

hasti ke wo sare pech-o-KHam kuchh kah na sake kuchh bhul gae

wo sher-e-mujassam jaan-e-suKHan har sans mein yun hai naghma-zan

afsana-e-gham rudad-e-alam kuchh kah na sake kuchh bhul gae

kab daur-e-KHizan aaya aur kab ruKHsat wo gul-e-ranai hua

mahrumi-e-jaan majburi-e-gham kuchh kah na sake kuchh bhul gae

dil aise purane papi ko kya kaam hai din-o-iman se

wo saz-e-kalisa soz-e-haram kuchh kah na sake kuchh bhul gae

unwan yahi Thahre 'sarwar' afsana-e-hasti ke tere

ya qalb-e-hazin ya dida-e-nam kuchh kah na sake kuchh bhul gae