iqrar hi ke sath ye inkar abhi se

iqrār hī ke saath ye inkār abhī se

dil toḌte ho kyoñ mirā paimāñ-shikanī se

har ik ko hai ab uns usī but kī galī se

vīrān huiiñ masjideñ suune haiñ kalīse

bosa hī mujhe do jo nahīñ vasl pe raazī

achchhā hai vahī kaam jo ho jaa.e ḳhushī se

vaa.iz jo patā ḳhuld kā pūchhe to batā duuñ

jannat kī taraf jaate haiñ us but kī galī se

baaz aao buto apnī jafāoñ se ḳhudā-rā

toḌo na mirā shīsha-e-dil tañg-dilī se

tum aaj zarūr aaoge lekin ye batā do

sachchā koī iqrār kiyā bhī hai kisī se

puurā kare allāh mire dil kā irāda

mar kar bhī na uTThūñ but-e-kāfir kī galī se

vaa.iz ye baraste hue bādal ye ghaTā.eñ

maiñ bach nahīñ saktā kabhī tauba-shikanī se

maiñ kis se 'fahīm' aur kahūñ hāl-e-ġham apnā

allāh hai āgāh mire dard-e-dilī se

iqrar hi ke sath ye inkar abhi se

dil toDte ho kyon mera paiman-shikani se

har ek ko hai ab uns usi but ki gali se

viran huin masjiden sune hain kalise

bosa hi mujhe do jo nahin wasl pe raazi

achchha hai wahi kaam jo ho jae KHushi se

waiz jo pata KHuld ka puchhe to bata dun

jannat ki taraf jate hain us but ki gali se

baz aao buto apni jafaon se KHuda-ra

toDo na mera shisha-e-dil tang-dili se

tum aaj zarur aaoge lekin ye bata do

sachcha koi iqrar kiya bhi hai kisi se

pura kare allah mere dil ka irada

mar kar bhi na uTThun but-e-kafir ki gali se

waiz ye baraste hue baadal ye ghaTaen

main bach nahin sakta kabhi tauba-shikani se

main kis se 'fahim' aur kahun haal-e-gham apna

allah hai aagah mere dard-e-dili se