irada uske safar ka palaT bhi sakta hai

irāda us ke safar kā palaT bhī saktā hai

vo apne ghar kī hadoñ meñ simaT bhī saktā hai

jo har kisī pe jamātā hai dhoñs daulat kī

vo apne ḳhuun ke rishtoñ se kaT bhī saktā hai

ġhurūr chhoḌ zamīñ zar haiñ be-sabāt yahāñ

phire nasīb to pāñsa ulaT bhī saktā hai

vo zimma-dār hai suljhā.egā masā.il ko

ye ghar kā bojh to aapas meñ baT bhī saktā hai

tirā makān kirā.e kā hai ye bhūlnā mat

kisī ghaḌī tirā bistar simaT bhī saktā hai

bahut tapāk se miltā hai TuuT kar vo rafīq

jo dekh le vo mujhe to palaT bhī saktā hai

tujhe ḳhudā ne jo tauqīr dī bachā ke rakh

ye martaba kisī laġhzish se ghaT bhī saktā hai

ḳhulūs-e-dil se koī bhī yahāñ nahīñ miltā

'azīm' shahr se ab dil uchaT bhī saktā hai

irada us ke safar ka palaT bhi sakta hai

wo apne ghar ki hadon mein simaT bhi sakta hai

jo har kisi pe jamata hai dhons daulat ki

wo apne KHun ke rishton se kaT bhi sakta hai

ghurur chhoD zamin zar hain be-sabaat yahan

phire nasib to pansa ulaT bhi sakta hai

wo zimma-dar hai suljhaega masail ko

ye ghar ka bojh to aapas mein baT bhi sakta hai

tera makan kirae ka hai ye bhulna mat

kisi ghaDi tera bistar simaT bhi sakta hai

bahut tapak se milta hai TuT kar wo rafiq

jo dekh le wo mujhe to palaT bhi sakta hai

tujhe KHuda ne jo tauqir di bacha ke rakh

ye martaba kisi laghzish se ghaT bhi sakta hai

KHulus-e-dil se koi bhi yahan nahin milta

'azim' shahr se ab dil uchaT bhi sakta hai