is ada se ishq ka aaghaz hona chahiye

is adā se ishq kā āġhāz honā chāhiye

soz bhī dil meñ ba-qadr-e-sāz honā chāhiye

jab mohabbat ko sarāpā raaz honā chāhiye

kyuuñ shikast-e-dil kī phir āvāz honā chāhiye

aap khul jā.egā ye bāb-e-qafas ai ham-nashīñ

dil meñ paidā jur.at-e-parvāz honā chāhiye

har navā-e-ārzū ko iztirāb-e-shauq meñ

dil ke har parde se ham-āvāz honā chāhiye

izn-e-jalva mil chukā hai ab tujhe a chashm-e-shauq

kāmyāb-e-jalva-gāh-e-nāz honā chāhiye

ishq se be-e'tinā.ī par kabhī ifshā na ho

itnā sanjīda mirā hamrāz honā chāhiye

jo mire jazbāt kā iz.hār tak hone na de

husn ko itnā zamāna-sāz honā chāhiye

har ḳhalish dil kī binā-e-kaif kā unvān ho

soz meñ shāmil nashāt-e-sāz honā chāhiye

mere ilhām-e-suḳhan meñ faiz hai sīmāb kā

'zeb' bazm-e-sher meñ mumtāz honā chāhiye

is ada se ishq ka aaghaz hona chahiye

soz bhi dil mein ba-qadr-e-saz hona chahiye

jab mohabbat ko sarapa raaz hona chahiye

kyun shikast-e-dil ki phir aawaz hona chahiye

aap khul jaega ye bab-e-qafas ai ham-nashin

dil mein paida jurat-e-parwaz hona chahiye

har nawa-e-arzu ko iztirab-e-shauq mein

dil ke har parde se ham-awaz hona chahiye

izn-e-jalwa mil chuka hai ab tujhe a chashm-e-shauq

kaamyab-e-jalwa-gah-e-naz hona chahiye

ishq se be-e'tinai par kabhi ifsha na ho

itna sanjida mera hamraaz hona chahiye

jo mere jazbaat ka izhaar tak hone na de

husn ko itna zamana-saz hona chahiye

har KHalish dil ki bina-e-kaif ka unwan ho

soz mein shamil nashat-e-saz hona chahiye

mere ilham-e-suKHan mein faiz hai simab ka

'zeb' bazm-e-sher mein mumtaz hona chahiye