is ahd mein suna hai majbur aadmi se

is ahd meñ sunā hai majbūr aadmī se

rahtā hai aadmī bhī ab duur aadmī se

ye raaz kab rahā hai mastūr aadmī se

zardār aadmī hai mazdūr aadmī se

azm-e-ḳhudī salāmat mushkil bhī koī shai hai

aksar huī mashiyyat majbūr aadmī se

khultī ga.iiñ haiñ jab se gumrāhiyoñ kī rāheñ

hotī ga.ī hai manzil ḳhud duur aadmī se

kahtā hai aur hī kuchh fuqdān-e-ādamiyyat

vaise to hai ye duniyā māmūr aadmī se

ham-jins ke lahū se khelegā kaun holī

hairat ki ye chalā hai dastūr aadmī se

jab aadmī hī bannā mushkil hai aadmī kā

kyūñkar ḳhudā banā thā mansūr aadmī se

gumnām aadmī kā duniyā meñ kār-nāma

mansūb ho rahegā mash.hūr aadmī se

is daur-e-bebasī meñ ye haal hai 'mubārak'

jiine kā chhin chukā hai maqdūr aadmī se

is ahd mein suna hai majbur aadmi se

rahta hai aadmi bhi ab dur aadmi se

ye raaz kab raha hai mastur aadmi se

zardar aadmi hai mazdur aadmi se

azm-e-KHudi salamat mushkil bhi koi shai hai

aksar hui mashiyyat majbur aadmi se

khulti gain hain jab se gumrahiyon ki rahen

hoti gai hai manzil KHud dur aadmi se

kahta hai aur hi kuchh fuqdan-e-adamiyyat

waise to hai ye duniya mamur aadmi se

ham-jins ke lahu se khelega kaun holi

hairat ki ye chala hai dastur aadmi se

jab aadmi hi banna mushkil hai aadmi ka

kyunkar KHuda bana tha mansur aadmi se

gumnam aadmi ka duniya mein kar-nama

mansub ho rahega mashhur aadmi se

is daur-e-bebasi mein ye haal hai 'mubarak'

jine ka chhin chuka hai maqdur aadmi se