is arz ke taKHte par sansar hai aur main hun

is arz ke taḳhte par sansār hai aur maiñ huuñ

mauhūm huā to kyā par yaar hai aur maiñ huuñ

paḌtī hai nazar jīdhar vo yaar hai aur maiñ huuñ

hai kaun sivā mere dildār hai aur maiñ huuñ

maiñ yaar kane qāsid bhejā to hai par shāyad

le naama agar aayā rībār hai aur maiñ huuñ

moḌūñgā nahīñ muñh ko maiñ ishq ke maidāñ se

is yaar ke abrū kī talvār hai aur maiñ huuñ

ab dekhiye kyā nibTe siina hai sipar apnā

vo ḳhanjar-e-mizhgāñ kā ḳhūñ-ḳhār hai aur maiñ huuñ

jab se ba-sanam-ḳhāna kī maiñ ne qadam-bosī

sau tarah kī zāhid se takrār hai aur maiñ huuñ

rāhib ne mire qashqa sandal kā lagāyā hai

nāqūs hai ghanTa hai zunnār hai aur maiñ huuñ

naf-o-zarar-e-duniyā duniyā hī pe maiñ chhoḌā

ab ishq kā ai yaaro bevpār hai aur maiñ huuñ

hairāñ maiñ huuñ ai yaaro kis vāste 'afrīdī'

rusvā.ī ba-har kūcha bāzār hai aur maiñ huuñ

is arz ke taKHte par sansar hai aur main hun

mauhum hua to kya par yar hai aur main hun

paDti hai nazar jidhar wo yar hai aur main hun

hai kaun siwa mere dildar hai aur main hun

main yar kane qasid bheja to hai par shayad

le nama agar aaya ribar hai aur main hun

moDunga nahin munh ko main ishq ke maidan se

is yar ke abru ki talwar hai aur main hun

ab dekhiye kya nibTe sina hai sipar apna

wo KHanjar-e-mizhgan ka KHun-KHar hai aur main hun

jab se ba-sanam-KHana ki main ne qadam-bosi

sau tarah ki zahid se takrar hai aur main hun

rahib ne mere qashqa sandal ka lagaya hai

naqus hai ghanTa hai zunnar hai aur main hun

naf-o-zarar-e-duniya duniya hi pe main chhoDa

ab ishq ka ai yaro bewpar hai aur main hun

hairan main hun ai yaro kis waste 'afridi'

ruswai ba-har kucha bazar hai aur main hun