is bazm-e-tasawwur mein bas yar ki baaten hain

is bazm-e-tasavvur meñ bas yaar kī bāteñ haiñ

mizhgāñ ke qasīde haiñ ruḳhsār kī bāteñ haiñ

hoñToñ ke darīchoñ par dildār kī bāteñ haiñ

parda bhī hai parde meñ dīdār kī bāteñ haiñ

iz.hār-e-mohabbat kā andāz nirālā hai

inkār ke lahje meñ iqrār kī bāteñ haiñ

din-rāt tasavvur meñ tasvīr tumhārī hai

is paar kī duniyā meñ us paar kī bāteñ haiñ

yuuñ kaif numāyāñ hai ġhazloñ meñ mirī jaise

āfāq kī vus.at meñ fankār kī bāteñ haiñ

āñkhoñ ko mirī paḌh kar saaqī ne kahā hañs kar

īqān zarā mushkil mai-ḳhvār kī bāteñ haiñ

ye ishq tumheñ 'zākir' kis moḌ pe le aayā

zanjīr hai pairoñ meñ jhankār kī bāteñ haiñ

is bazm-e-tasawwur mein bas yar ki baaten hain

mizhgan ke qaside hain ruKHsar ki baaten hain

honTon ke darichon par dildar ki baaten hain

parda bhi hai parde mein didar ki baaten hain

izhaar-e-mohabbat ka andaz nirala hai

inkar ke lahje mein iqrar ki baaten hain

din-raat tasawwur mein taswir tumhaari hai

is par ki duniya mein us par ki baaten hain

yun kaif numayan hai ghazlon mein meri jaise

aafaq ki wusat mein fankar ki baaten hain

aankhon ko meri paDh kar saqi ne kaha hans kar

iqan zara mushkil mai-KHwar ki baaten hain

ye ishq tumhein 'zakir' kis moD pe le aaya

zanjir hai pairon mein jhankar ki baaten hain