is bazm mein na hosh rahega zara mujhe

is bazm meñ na hosh rahegā zarā mujhe

ai shauq-e-harza-tāz kahāñ le chalā mujhe

ye dard-e-dil hī ziist kā bā'is hai chāra-gar

mar jā.ūñgā jo aa.ī muāfiq davā mujhe

is zauq-e-ibtilā kā maza us ke dam se hai

sab kuchh milā milā ho dil-e-mubtalā mujhe

dair-o-haram ko dekh liyā ḳhaak bhī nahīñ

bas ai talāsh-e-yār na dar dar phirā mujhe

ye dil se duur ho na dikhā.e ḳhudā vo din

zālim tirā ḳhayāl hai dil se sivā mujhe

ranj-o-malāl o hasrat-o-armān-o-ārzū

jaane se ek dil ke bahut kuchh milā mujhe

maiñ jāntā huuñ aap haiñ mast apne haal meñ

'beḳhud' nahīñ hai aap se mutlaq gilā mujhe

is bazm mein na hosh rahega zara mujhe

ai shauq-e-harza-taz kahan le chala mujhe

ye dard-e-dil hi zist ka ba'is hai chaara-gar

mar jaunga jo aai muafiq dawa mujhe

is zauq-e-ibtila ka maza us ke dam se hai

sab kuchh mila mila ho dil-e-mubtala mujhe

dair-o-haram ko dekh liya KHak bhi nahin

bas ai talash-e-yar na dar dar phira mujhe

ye dil se dur ho na dikhae KHuda wo din

zalim tera KHayal hai dil se siwa mujhe

ranj-o-malal o hasrat-o-arman-o-arzu

jaane se ek dil ke bahut kuchh mila mujhe

main jaanta hun aap hain mast apne haal mein

'beKHud' nahin hai aap se mutlaq gila mujhe