is but-kade mein tu jo hasin-tar laga mujhe

is but-kade meñ tū jo hasīñ-tar lagā mujhe

apne hī ik ḳhayāl kā paikar lagā mujhe

jab tak rahī jigar meñ lahū kī zarā sī buuñd

muTThī meñ apnī band samundar lagā mujhe

murjhā gayā jo dil meñ ujāle kā surḳh phuul

tāroñ bharā ye khet bhī banjar lagā mujhe

ab ye batā ki ruuh ke sho.ale kā kyā hai rañg

marmar kā ye libās to sundar lagā mujhe

kyā jāniye ki itnī udāsī thī raat kyuuñ

mahtāb apnī qabr kā patthar lagā mujhe

āñkhoñ ko band kar ke baḌī raushnī milī

maddham thā jo bhī naqsh ujāgar lagā mujhe

ye kyā ki dil ke diip kī lau hī tarāsh lī

sūraj agar hai kirnoñ kī jhālar lagā mujhe

sadiyoñ meñ tai huā thā bayābāñ kā rāsta

gulshan ko lauTte hue pal bhar lagā mujhe

maiñ ne use sharīk-e-safar kar liyā 'shakeb'

apnī tarah se chāñd jo be-ghar lagā mujhe

is but-kade mein tu jo hasin-tar laga mujhe

apne hi ek KHayal ka paikar laga mujhe

jab tak rahi jigar mein lahu ki zara si bund

muTThi mein apni band samundar laga mujhe

murjha gaya jo dil mein ujale ka surKH phul

taron bhara ye khet bhi banjar laga mujhe

ab ye bata ki ruh ke shoale ka kya hai rang

marmar ka ye libas to sundar laga mujhe

kya jaaniye ki itni udasi thi raat kyun

mahtab apni qabr ka patthar laga mujhe

aankhon ko band kar ke baDi raushni mili

maddham tha jo bhi naqsh ujagar laga mujhe

ye kya ki dil ke dip ki lau hi tarash li

suraj agar hai kirnon ki jhaalar laga mujhe

sadiyon mein tai hua tha bayaban ka rasta

gulshan ko lauTte hue pal bhar laga mujhe

main ne use sharik-e-safar kar liya 'shakeb'

apni tarah se chand jo be-ghar laga mujhe