اس چمن میں ہم نفس کیوں اس قدر نایاب ہے

اس چمن میں ہم نفس کیوں اس قدر نایاب ہے

ہر ممولا کیوں سمجھتا ہے کہ وہ سرخاب ہے

میں تو سمجھا تھا کہ دریائے ستم پایاب ہے

کیا پتا تھا دو کناروں میں چھپا سیلاب ہے

کیوں تری خوشبو سے مہکا ایک اک ذرہ یہاں

کیوں تری آواز میری روح کا مضراب ہے

ایک میں ہی تو نہیں اس شہر میں کچھ بے قرار

جاں بہ لب تیری طلب میں ہر کوئی بیتاب ہے

اک جگہ پر ٹک کے بیٹھے یہ تو ہو سکتا نہیں

ہر گھڑی حرکت میں رہتا ہے یہ دل سیماب ہے

ہے کسی کے حسن کے سورج کی اک ہلکی کرن

خود سے روشن ہے کہاں چہرہ اگر مہتاب ہے

گھات میں رستم تری تقدیر کا بیٹھا ہوا

گرچہ تو اپنے تئیں تدبیر کا سہراب ہے

درد کا دریا ہدایتؔ شعر کے کوزے میں بند

اور غزل کی بحر میں افکار کا گرداب ہے