is chaman mein ham-nafas kyon is qadar nayab hai

is chaman meñ ham-nafas kyoñ is qadar nāyāb hai

har mamolā kyoñ samajhtā hai ki vo surḳhāb hai

maiñ to samjhā thā ki dariyā-e-sitam pāyāb hai

kyā patā thā do kināroñ meñ chhupā sailāb hai

kyoñ tirī ḳhushbū se mahkā ek ik zarra yahāñ

kyoñ tirī āvāz merī ruuh kā mizrāb hai

ek maiñ hī to nahīñ is shahr meñ kuchh be-qarār

jāñ-ba-lab terī talab meñ har koī betāb hai

ik jagah par Tik ke baiThe ye to ho saktā nahīñ

har ghaḌī harakat meñ rahtā hai ye dil sīmāb hai

hai kisī ke husn ke sūraj kī ik halkī kiran

ḳhud se raushan hai kahāñ chehra agar mahtāb hai

ghaat meñ rustam tirī taqdīr kā baiThā huā

garche tū apne ta.iiñ tadbīr kā sohrāb hai

dard kā dariyā 'hidāyat' sher ke kuuze meñ band

aur ġhazal kī bahr meñ afkār kā girdāb hai

is chaman mein ham-nafas kyon is qadar nayab hai

har mamola kyon samajhta hai ki wo surKHab hai

main to samjha tha ki dariya-e-sitam payab hai

kya pata tha do kinaron mein chhupa sailab hai

kyon teri KHushbu se mahka ek ek zarra yahan

kyon teri aawaz meri ruh ka mizrab hai

ek main hi to nahin is shahr mein kuchh be-qarar

jaan-ba-lab teri talab mein har koi betab hai

ek jagah par Tik ke baiThe ye to ho sakta nahin

har ghaDi harakat mein rahta hai ye dil simab hai

hai kisi ke husn ke suraj ki ek halki kiran

KHud se raushan hai kahan chehra agar mahtab hai

ghat mein rustam teri taqdir ka baiTha hua

garche tu apne tain tadbir ka sohrab hai

dard ka dariya 'hidayat' sher ke kuze mein band

aur ghazal ki bahr mein afkar ka girdab hai