is Dar se ishaara na kiya honT na khole

is Dar se ishāra na kiyā hoñT na khole

dekhe ki na dekhe koī bole ki na bole

patthar kī tarah tum ne mirā sog manāyā

dāman na kabhī chaak kiyā baal na khole

maiñ ne sar-e-girdāb ka.ī baar pukārā

sāhil se magar log baḌī der se bole

maiñ ālam-e-tanhā.ī meñ niklā huuñ safar par

phir gardish-e-ayyām kahīñ saath na ho le

ham kohna rivāyāt ke mujrim haiñ ki ham ne

insāñ kabhī sone kī tarāzū meñ na tole

phir 'rām' yahāñ chup ko bahut der lagegī

jī khol ke hañs le abhī jī khol ke ro le

is Dar se ishaara na kiya honT na khole

dekhe ki na dekhe koi bole ki na bole

patthar ki tarah tum ne mera sog manaya

daman na kabhi chaak kiya baal na khole

main ne sar-e-girdab kai bar pukara

sahil se magar log baDi der se bole

main aalam-e-tanhai mein nikla hun safar par

phir gardish-e-ayyam kahin sath na ho le

hum kohna riwayat ke mujrim hain ki hum ne

insan kabhi sone ki taraazu mein na tole

phir 'ram' yahan chup ko bahut der lagegi

ji khol ke hans le abhi ji khol ke ro le