is darja mutmain hain teri dosti se hum

is darja mutma.in haiñ tirī dostī se ham

māñge agar to jaan bhī deñge ḳhushī se ham

kah Dāliye jo aap ke dil meñ hai be-dhaḌak

karte nahīñ haiñ baat kisī kī kisī se ham

hai un kī baat aur hai un kā hisāb aur

vaise to pyaar karte haiñ har aadmī se ham

yā-rab abhī bhī hai tirī rahmat pe e.atibār

be-shak haiñ be-hisāb ḳhafā zindagī se ham

achchhī lagīñ sabhī ko hamārī nasīhateñ

kahte haiñ talḳh baat bhī is sādgī se ham

hogī to jiit us kī bahar-hāl ishq meñ

kitnā kareñ muqābla mardāngī se ham

rahtā nahīñ mizāj hamesha to ek sā

kab tak saheñge jaur tire ḳhāmushī se ham

'parvāz' zindagī meñ jo honā thā ho chukā

kyoñ jaate jaate tauba kareñ mai-kashī se ham

is darja mutmain hain teri dosti se hum

mange agar to jaan bhi denge KHushi se hum

kah Daliye jo aap ke dil mein hai be-dhaDak

karte nahin hain baat kisi ki kisi se hum

hai un ki baat aur hai un ka hisab aur

waise to pyar karte hain har aadmi se hum

ya-rab abhi bhi hai teri rahmat pe eatibar

be-shak hain be-hisab KHafa zindagi se hum

achchhi lagin sabhi ko hamari nasihaten

kahte hain talKH baat bhi is sadgi se hum

hogi to jit us ki bahar-haal ishq mein

kitna karen muqabla mardangi se hum

rahta nahin mizaj hamesha to ek sa

kab tak sahenge jaur tere KHamushi se hum

'parwaz' zindagi mein jo hona tha ho chuka

kyon jate jate tauba karen mai-kashi se hum