is daur ki palkon pe hain aansu ki tarah hum

is daur kī palkoñ pe haiñ aañsū kī tarah ham

kuchh der meñ uḌ jā.eñge ḳhushbū kī tarah ham

baḌh kar kisī dāman ne bhī ham ko na sambhālā

āñkhoñ se Tapakte rahe aañsū kī tarah ham

kis phuul se bichhḌe haiñ ki phirte haiñ pareshāñ

jañgal meñ bhaTaktī huī ḳhushbū kī tarah ham

ab din ke ujāle meñ hameñ kaun pukāre

chamke the kabhī raat meñ jugnū kī tarah ham

har moḌ pe aa.iiñ tire dāman kī havā.eñ

har chhāñv ko samjhe tire gesū kī tarah ham

'qaisar' hameñ duniyā ne samajh kar bhī na samjhā

uljhe hī rahe kākul-e-urdu kī tarah ham

is daur ki palkon pe hain aansu ki tarah hum

kuchh der mein uD jaenge KHushbu ki tarah hum

baDh kar kisi daman ne bhi hum ko na sambhaala

aankhon se Tapakte rahe aansu ki tarah hum

kis phul se bichhDe hain ki phirte hain pareshan

jangal mein bhaTakti hui KHushbu ki tarah hum

ab din ke ujale mein hamein kaun pukare

chamke the kabhi raat mein jugnu ki tarah hum

har moD pe aain tere daman ki hawaen

har chhanw ko samjhe tere gesu ki tarah hum

'qaisar' hamein duniya ne samajh kar bhi na samjha

uljhe hi rahe kakul-e-urdu ki tarah hum