is daur mein jine ka sabab kis se kahen kya

is daur meñ jiine kā sabab kis se kaheñ kyā

ye sochnā paḌtā hai ki kab kis se kaheñ kyā

tarġhīb-e-ḳhud-īzā.ī to un hoñToñ ne dī thī

kyuuñ phūñk dī duniyā-e-tarab kis se kaheñ kyā

har koī to apne ko yahāñ bech rahā hai

phailā.eñ kahāñ dast-e-talab kis se kaheñ kyā

din shakloñ ke sailāb meñ bah jaatā hai lekin

mere liye kyā laatī hai shab kis se kaheñ kyā

bas karb kī chādar mire tan se na haTānā

baaqī nahīñ kuchh kahne ko ab kis se kaheñ kyā

is bazm-e-alā.eq meñ na sāme.a hai na bāsir

har samt hai ik shor-o-shaġhab kis se kaheñ kyā

be-kār taqāzā-e-vafā karnā hai 'hamdūn'

ab ho bhī chuke jān-ba-lab kis se kaheñ kyā

is daur mein jine ka sabab kis se kahen kya

ye sochna paDta hai ki kab kis se kahen kya

targhib-e-KHud-izai to un honTon ne di thi

kyun phunk di duniya-e-tarab kis se kahen kya

har koi to apne ko yahan bech raha hai

phailaen kahan dast-e-talab kis se kahen kya

din shaklon ke sailab mein bah jata hai lekin

mere liye kya lati hai shab kis se kahen kya

bas karb ki chadar mere tan se na haTana

baqi nahin kuchh kahne ko ab kis se kahen kya

is bazm-e-alaeq mein na samea hai na basir

har samt hai ek shor-o-shaghab kis se kahen kya

be-kar taqaza-e-wafa karna hai 'hamdun'

ab ho bhi chuke jaan-ba-lab kis se kahen kya