اس دھمک سے تو اگر پاؤں رکھے گا مجھ میں

اس دھمک سے تو اگر پاؤں رکھے گا مجھ میں

پھر کوئی چشمہ نیا پھوٹ بہے گا مجھ میں

کیوں نہ کچھ شور اٹھاؤں کہ وہ خاموش مزاج

بے ارادہ ہی سہی دھیان تو دے گا مجھ میں

گھر میں چلتے ہوئے ڈرتا ہوں کہ کوئی سایہ

آ کے ٹکرائے گا اور آ ہی بسے گا مجھ میں

اس قدر تنگ ہے دل اپنی پریشانی سے

سیر اچھی ہے مگر کون رہے گا مجھ میں

وقت جھاڑے گا نئے ہجر کے موسم کا شجر

اور اک لمحہ کوئی آن گرے گا مجھ میں

میرے نازک مری مٹی پہ بہت رقص نہ کر

دھیان کی رت ہے کوئی پھول کھلے گا مجھ میں