is dil ko tah-e-tegh sula kyon nahin dete

is dil ko tah-e-teġh sulā kyoñ nahīñ dete

har roz kā jhagḌā hai miTā kyoñ nahīñ dete

chehre se naqāb aap uThā kyoñ nahīñ dete

halkī sī jhalak ek dikhā kyoñ nahīñ dete

hairāñ huuñ ki ye shoḳh-o-hasīñ māh-jabīñ log

badle meñ vafāoñ ke vafā kyoñ nahīñ dete

rahzan ho to phir saath chale aate ho kyūñkar

rahbar ho to manzil kā pata kyoñ nahīñ dete

ġham aur bhī dil kā jo shab-e-hijr baḌhā.e

is sham-e-fasurda ko bujhā kyoñ nahīñ dete

is dil kī tabāhī pe pashemāñ ho agar tum

is ḳhāna-vīrāñ ko basā kyoñ nahīñ dete

vo baat ki jo tark-e-ta.alluq kā sabab hai

vo baat hameñ aap batā kyoñ nahīñ dete

betāb mohabbat meñ ho gar itne hī 'nayyar'

afsāna-e-dil un ko sunā kyoñ nahīñ dete

is dil ko tah-e-tegh sula kyon nahin dete

har roz ka jhagDa hai miTa kyon nahin dete

chehre se naqab aap uTha kyon nahin dete

halki si jhalak ek dikha kyon nahin dete

hairan hun ki ye shoKH-o-hasin mah-jabin log

badle mein wafaon ke wafa kyon nahin dete

rahzan ho to phir sath chale aate ho kyunkar

rahbar ho to manzil ka pata kyon nahin dete

gham aur bhi dil ka jo shab-e-hijr baDhae

is sham-e-fasurda ko bujha kyon nahin dete

is dil ki tabahi pe pasheman ho agar tum

is KHana-viran ko basa kyon nahin dete

wo baat ki jo tark-e-talluq ka sabab hai

wo baat hamein aap bata kyon nahin dete

betab mohabbat mein ho gar itne hi 'nayyar'

afsana-e-dil un ko suna kyon nahin dete