is dil mein apni jaan kabhi hai kabhi nahin

is dil meñ apnī jaan kabhī hai kabhī nahīñ

ābād ye makān kabhī hai kabhī nahīñ

ġhairoñ kī baat kyā kahūñ is kī to yaad meñ

apnā bhī mujh ko dhiyān kabhī hai kabhī nahīñ

vo din ga.e jo karte the ham muttasil fuġhāñ

ab āh-e-nā-tavān kabhī hai kabhī nahīñ

jis aan meñ rahe tū use jaan muġhtanim

yaañ kī har ek aan kabhī hai kabhī nahīñ

ayyām-e-vasl par to bharosa na kījiyo

ye vaqt merī jaan kabhī hai kabhī nahīñ

aadat jo hai hamesha se us kī so hai ġharaz

vo ham pe mehrbān kabhī hai kabhī nahīñ

is dostī kā terī talavvun-mizājī se

apne ta.iiñ gumān kabhī hai kabhī nahīñ

maġhrūr hojiyo na is auj-o-hasham pe tū

yaañ kī ye izz-o-shān kabhī hai kabhī nahīñ

āshiq kahīñ huā hai 'hasan' kyā hai us kā haal

ye aap meñ javān kabhī hai kabhī nahīñ

is dil mein apni jaan kabhi hai kabhi nahin

aabaad ye makan kabhi hai kabhi nahin

ghairon ki baat kya kahun is ki to yaad mein

apna bhi mujh ko dhiyan kabhi hai kabhi nahin

wo din gae jo karte the hum muttasil fughan

ab aah-e-na-tawan kabhi hai kabhi nahin

jis aan mein rahe tu use jaan mughtanim

yan ki har ek aan kabhi hai kabhi nahin

ayyam-e-wasl par to bharosa na kijiyo

ye waqt meri jaan kabhi hai kabhi nahin

aadat jo hai hamesha se us ki so hai gharaz

wo hum pe mehrban kabhi hai kabhi nahin

is dosti ka teri talawwun-mizaji se

apne tain guman kabhi hai kabhi nahin

maghrur hojiyo na is auj-o-hasham pe tu

yan ki ye izz-o-shan kabhi hai kabhi nahin

aashiq kahin hua hai 'hasan' kya hai us ka haal

ye aap mein jawan kabhi hai kabhi nahin