is duniya mein yun to mile hain pyar ke dawedar bahut

is duniyā meñ yuuñ to mile haiñ pyaar ke da.avedār bahut

mushkil meñ kaam ek na aaya dekhe ham ne yaar bahut

pyaar kī rāheñ avval avval sahl dikhā.ī detī thiiñ

āḳhir āḳhir ilm huā ye manzil hai dushvār bahut

muñh ke mīThe man ke khoTe jaan ke vo dushman nikle

is nagrī meñ jin ko ham ne samjhā thā ġham-ḳhvār bahut

jin āñkhoñ meñ Duub ke ham ne chāhā thā sukh pā.eñge

un āñkhoñ meñ Duub ke ham ne paa.e haiñ āzār bahut

qismat se miltā hai sāhil ummīdoñ kī kashtī ko

sāhil se sāhil tak varna phaile haiñ mañjdhār bahut

aap ke gītoñ kī duniyā meñ baat anokhī hai pyāre

sher is rang meñ kahne vaale dekhe haiñ fankār bahut

is duniya mein yun to mile hain pyar ke dawedar bahut

mushkil mein kaam ek na aaya dekhe hum ne yar bahut

pyar ki rahen awwal awwal sahl dikhai deti thin

aaKHir aaKHir ilm hua ye manzil hai dushwar bahut

munh ke miThe man ke khoTe jaan ke wo dushman nikle

is nagri mein jin ko hum ne samjha tha gham-KHwar bahut

jin aankhon mein Dub ke hum ne chaha tha sukh paenge

un aankhon mein Dub ke hum ne pae hain aazar bahut

qismat se milta hai sahil ummidon ki kashti ko

sahil se sahil tak warna phaile hain manjdhaar bahut

aap ke giton ki duniya mein baat anokhi hai pyare

sher is rang mein kahne wale dekhe hain fankar bahut