is gham ko gham kahen to kahen sau mein hum ghalat

is ġham ko ġham kaheñ to kaheñ sau meñ ham ġhalat

barsoñ tumhāre ġham se kiyā ham ne ġham ġhalat

kahnā ye tum se hai ki falak darmiyāñ na ho

rasm-e-sitam durust hai tarz-e-sitam ġhalat

kis ko tire itaab kī duniyā meñ taab hai

dam kī koī kahe to ġhalat ek dam ġhalat

insān kā havā pe madār-e-hayāt hai

kyā zindagī meñ jaan hai dam kā bharam ġhalat

vo bhī ḳhirām-e-nāz se bhūlā hai chaukḌī

kartā hai ab to āhū-e-sahrā bhī ram ġhalat

'nātiq' ḳhayāl-e-ishq bajā fikr-e-aish raast

kis vahm meñ paḌā hai ye donoñ baham ġhalat

is gham ko gham kahen to kahen sau mein hum ghalat

barson tumhaare gham se kiya hum ne gham ghalat

kahna ye tum se hai ki falak darmiyan na ho

rasm-e-sitam durust hai tarz-e-sitam ghalat

kis ko tere itab ki duniya mein tab hai

dam ki koi kahe to ghalat ek dam ghalat

insan ka hawa pe madar-e-hayat hai

kya zindagi mein jaan hai dam ka bharam ghalat

wo bhi KHiram-e-naz se bhula hai chaukDi

karta hai ab to aahu-e-sahra bhi ram ghalat

'natiq' KHayal-e-ishq baja fikr-e-aish rast

kis wahm mein paDa hai ye donon baham ghalat