اس گھٹا ٹوپ اندھیرے کا سماں کیا کہئے

اس گھٹا ٹوپ اندھیرے کا سماں کیا کہئے

حسن تدبیر ہے ایسے میں کہاں کیا کہئے

کچھ جو کہتے ہیں تو کٹتی ہے زباں کیا کہئے

سرگزشت اپنی سر نوک سناں کیا کہئے

ربط باہم میں بھی تسکین دل زار کہاں

کس کشاکش میں ہے یہ عمر رواں کیا کہئے

مسئلے دل کے سلجھتے نہیں سلجھانے سے

ہو اگر ہوتا ہے احساس زیاں کیا کہئے

بت کدہ والوں نے اصنام تراشے کیا کیا

مطمئن پھر بھی نہیں قلب تپاں کیا کہئے

جن سے دنیا کو توقع تھی جہاں بانی کی

مانگتے پھرتے ہیں وہ اذن اذاں کیا کہئے

اختیارات کسی اور تو کیا خود پہ نہیں

موج خوں بھی ہے جہان دگراں کیا کہئے

شعر گوئی کی سند لیجئے کس سے حامدؔ

ہم ہیں اور مجمع صد بے ہنراں کیا کہئے