is ghaTa-Top andhere ka saman kya kahiye

is ghaTā-Top añdhere kā samāñ kyā kahiye

husn-e-tadbīr hai aise meñ kahāñ kyā kahiye

kuchh jo kahte haiñ to kaTtī hai zabāñ kyā kahiye

sarguzasht apnī sar-e-nok-e-sināñ kyā kahiye

rabt-e-bāham meñ bhī taskīn-e-dil-e-zār kahāñ

kis kashākash meñ hai ye umr-e-ravāñ kyā kahiye

mas.ale dil ke sulajhte nahīñ suljhāne se

ho agar hotā hai ehsās-e-ziyāñ kyā kahiye

but-kade vāloñ ne asnām tarāshe kyā kyā

mutma.in phir bhī nahīñ qalb-e-tapāñ kyā kahiye

jin se duniyā ko tavaqqo thī jahāñbānī kī

māñgte phirte haiñ vo izn-e-azāñ kyā kahiye

iḳhtiyārāt kisī aur to kyā ḳhud pe nahīñ

mauj-e-ḳhūñ bhī hai jahān-e-digrāñ kyā kahiye

sher-goī kī sanad lījiye kis se 'hāmid'

ham haiñ aur majma.a-e-sad-be-hunrāñ kyā kahiye

is ghaTa-Top andhere ka saman kya kahiye

husn-e-tadbir hai aise mein kahan kya kahiye

kuchh jo kahte hain to kaTti hai zaban kya kahiye

sarguzasht apni sar-e-nok-e-sinan kya kahiye

rabt-e-baham mein bhi taskin-e-dil-e-zar kahan

kis kashakash mein hai ye umr-e-rawan kya kahiye

masale dil ke sulajhte nahin suljhane se

ho agar hota hai ehsas-e-ziyan kya kahiye

but-kade walon ne asnam tarashe kya kya

mutmain phir bhi nahin qalb-e-tapan kya kahiye

jin se duniya ko tawaqqo thi jahanbani ki

mangte phirte hain wo izn-e-azan kya kahiye

iKHtiyaraat kisi aur to kya KHud pe nahin

mauj-e-KHun bhi hai jahan-e-digran kya kahiye

sher-goi ki sanad lijiye kis se 'hamid'

hum hain aur majma-e-sad-be-hunran kya kahiye