is haqiqat ke siwa kya shahr kya virana tha

is haqīqat ke sivā kyā shahr kyā vīrāna thā

yā mirā afsāna thā yā aap kā afsāna thā

sehr āñkhoñ kā tirī kyā sāqi-e-mai-ḳhāna thā

mai-kashoñ par kaif taarī raqs meñ paimāna thā

yuuñ tajassus meñ kisī kī phir rahā thā kū-bakū

ashk-e-ḳhūñ āñkhoñ meñ lab par ishq kā afsāna thā

vo bhī kyā din kyā zamāna thā ki jab sab ke liye

faiz-e-sāqī aam thā aur vā dar-e-mai-ḳhāna thā

rah gayā ban kar junūn-e-ishq sharh-e-kā.enāt

ek vo lafz-e-anal-haq jo ki gustāḳhāna thā

ek hī markaz pe thā nazzāra-e-nāz-o-niyāz

merī sūrat se ayaañ aks-e-ruḳh-e-jānāna thā

'dard' us kī zindagī bhī thī bhalā kyā zindagī

ġham se jo nā-āshnā thā dard se begāna thā

is haqiqat ke siwa kya shahr kya virana tha

ya mera afsana tha ya aap ka afsana tha

sehr aankhon ka teri kya saqi-e-mai-KHana tha

mai-kashon par kaif tari raqs mein paimana tha

yun tajassus mein kisi ki phir raha tha ku-baku

ashk-e-KHun aankhon mein lab par ishq ka afsana tha

wo bhi kya din kya zamana tha ki jab sab ke liye

faiz-e-saqi aam tha aur wa dar-e-mai-KHana tha

rah gaya ban kar junun-e-ishq sharh-e-kaenat

ek wo lafz-e-anal-haq jo ki gustaKHana tha

ek hi markaz pe tha nazzara-e-naz-o-niyaz

meri surat se ayan aks-e-ruKH-e-jaanana tha

'dard' us ki zindagi bhi thi bhala kya zindagi

gham se jo na-ashna tha dard se begana tha