is iltifat par koi daman na tham le

is iltifāt par koī dāman na thaam le

hai maslahat yahī ki taġhāful se kaam le

kuchh der kī ḳhushī se to behtar hai ġham mujhe

merī taraf na dekh na merā salām le

maiñ bhī to terī bazm meñ aayā huuñ der se

ab tū bhī mujh se ho ke ḳhafā intiqām le

jī bhar ke pahle apnī nazar se pilā mujhe

varna ye mai-kada le surāhī le jaam le

merī nigāh-e-shauq pe phir kījiyo nazar

pahle zarā ḳhud apne kaleje ko thaam le

mahfil meñ sab ke sāmne dād-e-ġhazal na de

yuuñ dil hī dil meñ shauq se lutf-e-kalām le

jis ne kabhī ḳhulūs bhī māñgā na ho tirā

is ahl-e-dil kā naam ba-sad-ehtirām le

jiine na deñge dekhne vaale kabhī hameñ

achchhā ye hai ki jabr-e-mohabbat se kaam le

hai dekhnā hī merī taraf to ba-ehtiyāt

mahfil meñ pahle jā.eza-e-ḳhās-o-ām le

terā huuñ aur terā rahūñgā tamām umr

lekin mire liye na koī ittihām le

milnā nasīb meñ hai to mil jā.eñge kabhī

jān-e-'shamīm' sabr-o-tahammul se kaam le

is iltifat par koi daman na tham le

hai maslahat yahi ki taghaful se kaam le

kuchh der ki KHushi se to behtar hai gham mujhe

meri taraf na dekh na mera salam le

main bhi to teri bazm mein aaya hun der se

ab tu bhi mujh se ho ke KHafa intiqam le

ji bhar ke pahle apni nazar se pila mujhe

warna ye mai-kada le surahi le jam le

meri nigah-e-shauq pe phir kijiyo nazar

pahle zara KHud apne kaleje ko tham le

mahfil mein sab ke samne dad-e-ghazal na de

yun dil hi dil mein shauq se lutf-e-kalam le

jis ne kabhi KHulus bhi manga na ho tera

is ahl-e-dil ka nam ba-sad-ehtiram le

jine na denge dekhne wale kabhi hamein

achchha ye hai ki jabr-e-mohabbat se kaam le

hai dekhna hi meri taraf to ba-ehtiyat

mahfil mein pahle jaeza-e-KHas-o-am le

tera hun aur tera rahunga tamam umr

lekin mere liye na koi ittiham le

milna nasib mein hai to mil jaenge kabhi

jaan-e-'shamim' sabr-o-tahammul se kaam le