is imtihan mein bhi pura utar gaya har shaKHs

is imtihāñ meñ bhī puurā utar gayā har shaḳhs

ḳhud apne ḳhuuñ meñ nahā kar nikhar gayā har shaḳhs

na jaane kaun sī aahaT pe Dar gayā har shaḳhs

ye kyā huā ki achānak bikhar gayā har shaḳhs

fasurda shaam meñ yuuñ reñgte haiñ sannāTe

ki jaise maut se pahle hī mar gayā har shaḳhs

ye kis pe mar miTā dīvāna-vār har koī

ye kis kī raah meñ jaañ se guzar gayā har shaḳhs

añdherī raat meñ anjān siskiyoñ kī sadā

jo aa.ī kānoñ meñ yak-laḳht Dar gayā har shaḳhs

dikhā.ī detā nahīñ duur duur tak koī

maiñ kis se pūchhūñ ki āḳhir kidhar gayā har shaḳhs

mire ḳhayāl meñ 'parvez' ye bhī Thiik huā

ḳhud apnī zaat kī tah meñ utar gayā har shaḳhs

is imtihan mein bhi pura utar gaya har shaKHs

KHud apne KHun mein naha kar nikhar gaya har shaKHs

na jaane kaun si aahaT pe Dar gaya har shaKHs

ye kya hua ki achanak bikhar gaya har shaKHs

fasurda sham mein yun rengte hain sannaTe

ki jaise maut se pahle hi mar gaya har shaKHs

ye kis pe mar miTa diwana-war har koi

ye kis ki rah mein jaan se guzar gaya har shaKHs

andheri raat mein anjaan siskiyon ki sada

jo aai kanon mein yak-laKHt Dar gaya har shaKHs

dikhai deta nahin dur dur tak koi

main kis se puchhun ki aaKHir kidhar gaya har shaKHs

mere KHayal mein 'parwez' ye bhi Thik hua

KHud apni zat ki tah mein utar gaya har shaKHs