is inkisar ka idrak tujhko kam hoga

is inkisār kā idrāk tujh ko kam hogā

mire charāġh kī lau meñ bhī thoḌā nam hogā

lapak paḌūñgā maiñ tasvīr se tirī jānib

ye terī samt mirā āḳhirī qadam hogā

guzishta raat mujhe sīḌhiyoñ meñ yaad aayā

tirī thakan kā sabab bhī kisī kā ġham hogā

maiñ jāntā thā mujhe raushnī vadī.at hai

maiñ jāntā thā mire haath meñ qalam hogā

hamāre sānehe tahdār kar diye ga.e haiñ

hamārī tīrgī kā aag se janam hogā

maiñ ḳhushk jhiil meñ sahmī huī namī huuñ dost

mirā machheroñ ke gītoñ se ḳhauf kam hogā

safar meñ us ko agar peḌ kam paḌe 'ārish'

to us kā rasta mire rāste meñ zam hogā

is inkisar ka idrak tujh ko kam hoga

mere charagh ki lau mein bhi thoDa nam hoga

lapak paDunga main taswir se teri jaanib

ye teri samt mera aaKHiri qadam hoga

guzishta raat mujhe siDhiyon mein yaad aaya

teri thakan ka sabab bhi kisi ka gham hoga

main jaanta tha mujhe raushni wadiat hai

main jaanta tha mere hath mein qalam hoga

hamare sanehe tahdar kar diye gae hain

hamari tirgi ka aag se janam hoga

main KHushk jhil mein sahmi hui nami hun dost

mera machheron ke giton se KHauf kam hoga

safar mein us ko agar peD kam paDe 'arish'

to us ka rasta mere raste mein zam hoga