is intishaar ka koi asar bhi hai ki nahin

is intishār kā koī asar bhī hai ki nahīñ

tujhe zavāl kī apne ḳhabar bhī hai ki nahīñ

kahīñ fareb na detī hoñ mil ke kuchh maujeñ

jahāñ tū Duub rahā hai bhañvar bhī hai ki nahīñ

yaqīn karne se pahle pata lagā to sahī

ki tere dil kī sadā mo'tabar bhī hai ki nahīñ

ye roz apne ta.āqub meñ dar-ba-dar phirnā

batā masāfat-e-hastī safar bhī hai ki nahīñ

kabhī tū apne ḳhazīne uchhāl sāhil par

kisī sadaf meñ ye dekheñ guhar bhī hai ki nahīñ

maiñ jis kī shāḳh pe chhoḌ aayā āshiyāñ apnā

ye sochtā huuñ ki ab vo shajar bhī hai ki nahīñ

havā se le to liyā Dher sūkhe pattoñ kā

na jaane raakh meñ merī sharar bhī hai ki nahīñ

maiñ jis ke chaak pe rakkhā huuñ 'shād' Dhalne ko

mujhe to shak hai ki vo kūza-gar bhī hai ki nahīñ

is intishaar ka koi asar bhi hai ki nahin

tujhe zawal ki apne KHabar bhi hai ki nahin

kahin fareb na deti hon mil ke kuchh maujen

jahan tu Dub raha hai bhanwar bhi hai ki nahin

yaqin karne se pahle pata laga to sahi

ki tere dil ki sada mo'tabar bhi hai ki nahin

ye roz apne taaqub mein dar-ba-dar phirna

bata masafat-e-hasti safar bhi hai ki nahin

kabhi tu apne KHazine uchhaal sahil par

kisi sadaf mein ye dekhen guhar bhi hai ki nahin

main jis ki shaKH pe chhoD aaya aashiyan apna

ye sochta hun ki ab wo shajar bhi hai ki nahin

hawa se le to liya Dher sukhe patton ka

na jaane rakh mein meri sharar bhi hai ki nahin

main jis ke chaak pe rakkha hun 'shad' Dhalne ko

mujhe to shak hai ki wo kuza-gar bhi hai ki nahin