is ishq ke hathon se hargiz na mafar dekha

is 'ishq ke hāthoñ se hargiz na mafar dekhā

utnī hī baḌhī hasrat jitnā hī udhar dekhā

thā khel sā pahle 'ishq lekin jo khulīñ āñkheñ

Duubā huā rag rag meñ vo tīr-e-nazar dekhā

sab ho ga.ī uTh uTh kar ik baaz nisār sham'

parvānoñ ne kyā jaane kyā vaqt-e-sahar dekhā

vo ashk bharī āñkheñ aur dard bhare naale

allāh na dikhlā.e jo vaqt-e-sahar dekhā

qurbāñ tirī āñkhoñ ke sadqe tarī nazroñ ke

thā hāsil-e-sad-nāvak jo zaḳhm-e-jigar dekhā

jaate rahe dam-bhar meñ saare hī gile shikve

us jān-e-taġhāful ne jab ek nazar dekhā

ahd-e-ġham-e-furqat meñ dil aur jigar kaise

ik zaḳhm idhar paayā ik daaġh udhar dekhā

thā bā.is-e-rusvā.ī har-chand junūñ merā

un ko bhī na chain aayā jab tak na idhar dekhā

is chashm-e-ġhazāleñ ko mai-ḳhāna-e-dil paayā

us rū-e-nigārīñ ko firdaus-e-nazar dekhā

yuuñ dil ko taḌapne kā kuchh to hai sabab āḳhir

yā dard ne karvaT lī yā tum ne idhar dekhā

kyā jāniye kyā guzrī hañgām-e-junūñ lekin

kuchh hosh ho aayā to ujḌā huā ghar dekhā

māthe pe pasīnā kyuuñ āñkhoñ meñ namī kaisī

kuchh ḳhair to hī tum ne kyā hāl-e-jigar dekhā

is 'ishq ke hathon se hargiz na mafar dekha

utni hi baDhi hasrat jitna hi udhar dekha

tha khel sa pahle 'ishq lekin jo khulin aankhen

Duba hua rag rag mein wo tir-e-nazar dekha

sab ho gai uTh uTh kar ek baz nisar sham'

parwanon ne kya jaane kya waqt-e-sahar dekha

wo ashk bhari aankhen aur dard bhare nale

allah na dikhlae jo waqt-e-sahar dekha

qurban teri aankhon ke sadqe tari nazron ke

tha hasil-e-sad-nawak jo zaKHm-e-jigar dekha

jate rahe dam-bhar mein sare hi gile shikwe

us jaan-e-taghaful ne jab ek nazar dekha

ahd-e-gham-e-furqat mein dil aur jigar kaise

ek zaKHm idhar paya ek dagh udhar dekha

tha bais-e-ruswai har-chand junun mera

un ko bhi na chain aaya jab tak na idhar dekha

is chashm-e-ghazalen ko mai-KHana-e-dil paya

us ru-e-nigarin ko firdaus-e-nazar dekha

yun dil ko taDapne ka kuchh to hai sabab aaKHir

ya dard ne karwaT li ya tum ne idhar dekha

kya jaaniye kya guzri hangam-e-junun lekin

kuchh hosh ho aaya to ujDa hua ghar dekha

mathe pe pasina kyun aankhon mein nami kaisi

kuchh KHair to hi tum ne kya haal-e-jigar dekha