اس جگہ کی خاص اک پہچان ہے

اس جگہ کی خاص اک پہچان ہے

لوگ ہیں بے حس بتوں میں جان ہے

ہے بہت انجان گلیوں سے سڑک

سیڑھیوں سے گھر ہر اک انجان ہے

صبح میں ہیں سرخیاں اخبار کی

شہر یہ اک بند روشندان ہے

آدمی کو دیکھنا نزدیک سے

بھیڑ میں سب سے بڑا سنسان ہے

پیار کو آسان ہے کیا بھولنا

راہ میں چھوٹا ہوا سامان ہے

آج پھر گھر پر ہی چھاتا رہ گیا

آج پھر برسات کا امکان ہے

دوست دشمن آ کے سکھ دکھ بانٹتے

دل بہت دن سے ہوا دالان ہے

پھر مچھیرے ناؤ لے کر چل پڑے

پیٹ سے بڑھ کر کہاں طوفان ہے

زندگی کو جب جیا تب یہ لگا

شاعری کرنا بہت آسان ہے

پڑھنا سننا غور سے انمیشؔ کو

اس کا ہر اک شعر اک دیوان ہے